ਹੱਥ ਲਿਖਤ ਨੰਬਰ 236

੩੧. ਹੀਰ ਵਾਰਿਸ ਸ਼ਾਹ ਕੀ (ਫ਼ਾਰਸੀ ਲਿਪੀ)
ਲੇਖਕ : ਸੱਯਦ ਵਾਰਿਸ ਸ਼ਾਹ।
ਵੇਰਵਾ : ਪੱਤਰੇ ੧੬੨; ਪੱਤਰਾ ਨੰ. ੩, ੧੧੦ ਅਤੇ ੧੫੩ ਤੋਂ ੧੫੬ ਤਕ ੬ ਪੱਤਰੇ ਗੁੰਮ,ਪ੍ਰਤੀ ਸਫ਼ਾ ੧੩ ਸਤਰਾਂ: ਕਾਗਜ਼ ਦੇਸੀ, ਕਿਰਮ ਖੁਰਦਾ; ਲਿਖਤ ਸਿੱਧੀ ਸਾਦੀ ਫਾਰਸੀ, ਜੋ ਆਸਾਨੀ ਨਾਲ ਪੜ੍ਹੀ ਜਾ ਸਕਦੀ ਹੈ: ਹਾਸ਼ੀਆ ਸਾਦਾ ਪੱਤਰੇ ੧੫੩ ਤੋਂ ੧੫੭ ਤੱਕ ਨੁਕਸਦਾਰ; ਪੁਸਤਕ ਬਿਨਾਂ ਜਿਲਦ: ਲਿਖਤ ਦੀ ਸਿਆਹੀ ਫਿੱਕੀ ਕਾਲੀ; ਲਗ ਭਗ ਸਾਰੀ ਹੀ ਪੁਸਤਕ ਦੇ ਪੱਤਰੇ ਨੁਕੱਰਾਂ ਤੋਂ ਭੂਰੇ ਹੋਏ, ਕਵਿਤਾ ਦੇ ਪਾਠ ਬੜੇ ਸਹੀ ਤੇ ਸ਼ੁੱਧ, ਪਰ ਉਪਰੋਕਤ ਕਮੀਆਂ ਦੇ ਕਾਰਣ ਪੁਸਤਕ ਨਾਮੁਕੰਮਲ।
ਸਮਾਂ : ੨੮ ਭਾਦੋਂ, ਸੰਮਤ ੧੮੯੧ (ਮੁਤਾਬਿਕ ੧੮੩੪ ਈ.)।
ਲਿਖਾਰੀ : ਮੁਹਕਮ ਦੀਨ ਪੁਤਰ ਗੁਲਾਮ ਮੁਹੰਮਦ।
ਸਥਾਨ : ਨਾਮਾਲੂਮ।
ਆਰੰਭ : . ਅਵਲ ਹਮਦ ਖੁਦਾਇ ਦਾ ਵਿਰਦ ਕੀਚੇ, ਕੀਤਾ ਇਸ਼ਕ ਸੋ ਜੱਗ ਦਾ ਮੂਲ ਮੀਆਂ........
ਅੰਤ : ਤ੍ਰਿਜਨ ਏਹ ਬਦ ਅਮਲੀਆ ਤੇਰੀਆ ਨੀ, ਕੱਢ ਭਿਸ਼ਤ ਥੀਂ ਦੋਜ਼ਖੇ ਪਾਇਆ ਈ।
ਓਹ ਮਸਜਿਦ ਮਾਉਂ ਦਾ ਸ਼ਿਕਮ ਬੰਦੇ, ਜਿਸ ਵਿੱਚ ਸ਼ਬ ਰੋਜ਼ ਲੰਘਾਇਆ ਈ।
ਅਦਲੀ ਰਾਜਾ ਏਹ ਨੇਕ ਨੀ ਅਮਲ ਤੇਰੇ, ਜਿਸ ਹੀਰ ਈਮਾਨ ਦਿਵਾਇਆ ਈ।
ਵਾਰਿਸ ਸ਼ਾਹ ਮੀਆਂ ਬੇੜੇ ਪਾਰ ਹੋਏ, ਕਲਮਾ ਪਾਕ ਜ਼ਬਾਨ ਤੇ ਆਇਆ ਈ।
ਅੱਗੇ ਫ਼ਾਰਸੀ ਵਿੱਚ ਲਿਖਾਰੀ ਵਲੋਂ ਮਿਤੀ 28 ਭਾਦਰ 1891 ਦਿੱਤੀ ਗਈ ਹੈ।
ਇਸ ਮਗਰੋਂ ਹਜ਼ਤ ਮੀਰ ਦਸਤ ਗੀਰ ਮੁਹੀਉੱਦੀਨ ਗੁਲਾਮ ਕਾਦਰ ਜੀਲਾਨੀ ਦੀ ਤਾਰੀਫ਼ ਵਿੱਚ ਫ਼ਾਰਸੀ ਵਿੱਚ ਕੁਝ ਉਪਮਾ ਲਿਖੀ ਹੋਈ ਹੈ।